Hoggaamiyaha Maamulka SSC-Khaatumo ayaa saxeexay Miisaaniyadda 2025

Xeer Hoggaamiye No.XH/33/2025

Laascaanood, 16 Febraayo 2025:-Hoggaamiyaha Maamulka SSC-Khaatumo, Mudane Cabdiqaadir Axmed Aw-Cali, ayaa maanta saxeexay Miisaaniyadda 2025, kaddib ansixintii Golaha Baarlamaanka.

Sharcigan ayaa lagu meel mariyey si waafaqsan qodobka 11aad ee Axdiga Maamulka SSC-Khaatumo, iyada oo Baarlamaanku si rasmi ah u soo gudbiyey si uu Hoggaamiyuhu uga guto waajibaadkiisa Dastuuriga ah.

Hoggaamiye Cabdiqaadir Axmed Aw-Cali ayaa uga mahadceliyay Guddoonka Golaha Baarlamaanka iyo Xildhibaannada sharafta leh sida masuuliyadda leh ee ay u ansixiyeen sharcigan, isaga oo ku dhiirrigeliyay in ay sii wadaan dadaallada lagu dhammeystirayo xeerarka kale ee horyaalla.

Ugu dambeyn, Hoggaamiyaha ayaa xusay in Miisaaniyadda 2025 iyo Sharciga Hanti-dhowrka Guud ay laf-dhabar u yihiin maamulka maaliyadda iyo dhaqaalaha deegaanka, waxana uu caddeeyay in ay door weyn ka ciyaari doonaan kobcinta isla xisaabtanka, hufnaanta, iyo horumarinta adeegyada bulshada.